Свято-Никольский приход

Благослови́ Го́споди, пло́дъ се́й ло́зный но́вый, и́же благорастворе́ніемъ возду́шнымъ, и ка́плями дожде́вными и тишино́ю вре́менною, въ се́й зрѣ́лѣйшій пріити́ ча́съ благоволи́вый: да бу́детъ въ на́съ, отъ того́ рожде́нія ло́знаго причаща́ющихся, въ весе́ліе, и приноси́ти Тебѣ́ да́ръ во очище́ніе грѣхо́въ, свяще́ннымъ и святы́мъ тѣ́ломъ Христа́ Твоего́, съ Ни́мже благослове́нъ еси́, со Пресвяты́мъ, и Благи́мъ и Животворя́щимъ Твои́мъ Ду́хомъ, ны́нѣ и при́сно, и во вѣ́ки вѣко́въ, ами́нь.

Вѣ́домо же бу́ди, я́ко сія́ моли́тва глаго́лется надъ гро́здіемъ, идѣ́же виногра́ды, и прино́сятся на благослове́ніе во хра́мъ въ се́й 6-й де́нь Августа. Здѣ́ же въ Вели́цѣй Россíи, идѣ́же не обрѣта́ются виногра́ды, прино́сятся въ се́й де́нь ко хра́му я́блока, и глаго́лется моли́тва о принося́щихъ нача́тки овоще́й, е́йже нача́ло: Влады́ко Го́споди Бо́же на́шъ...

Та́кожде и и́но ово́щіе да прино́сится ко́еждо во свое́ вре́мя ко хра́му на благослове́ніе, и моли́тва глаго́лется надъ ни́ми та́же.